بدعة الاحتفال بالمولد النبوي.. الشيخ/ محمد حسين يعقوب

[ربيع الفردوس الاعلى و روضة القران]

أزعجني أن أحد الناس، واحد من أبنائنا اتصل بيّ من شوية وقال إن حد على قناة بيقول إن عدم الاحتفال بالمولد بدعة
أنا ساكت ومعديها لكن بتبقى مصيبة بقى إنك لما تسكت مابقاش زي زمان زي الناس ما بتقول النقاب مش فرض
ونفضل نناقش بقى النقاب فرض والّا سنة! لا ده بقوا بيقولوا النقاب حرام! النقاب مش من الدين خالص أصلًا
فبقت مصيبة مصيبة كبيرة إن النهارده مش بنناقش بقى هو بدعة والّا مش بدعة !لا ده بيقول اللي ما يحتفلش يبقى هو المبتدع !
يعني تسكت بقي ازاي؟! أنا مش من عادتي إني أرد على حد ولا أجيب سيرة حد ولا بأتكلم عن حد،
فعشان كده مش هأقول حد وإنما الكلام دين يا ناس والسنة اللي فاتت يعني بأقول إحنا بقالنا ثلاثين سنة، أكتر من ثلاثين سنة بأقول
وخرجت الأمة من المولد بلا حمص، السنة اللي فاتت قُلنا الحلاوة مسمومة خلوا بالكم السم في الحلاوة.. البدعة سم
ما احنا هيقول لي خدعوك فقالوا بدعة ده أنا اللي بأقول له خدعوك فقالوا مش بدعة!

تعريف البدعة:
لا دي بدعة لأن تعريف البدعة ببساطة ببساطة كلام ببساطة بدون الدخول في تفصيل ببساطة بدعة حاجة محدثة
"إياكم ومحدثات الأمور "صححه الألبانيده الكلام الواضح للنبي وعشان كده بأقول إيه حرامية النصوص..
فيه ناس حرامية بيسرقوا نصوص الكتاب والسنة سرقت النصوص إن هو يجيب الحديث بتاع بدعة حسنة يقول لك دي بدعة حسنة
ورسول الله أقرّها أهو لا يا ابني مش دي بمنتها البساطة عايز أقول بس البدعة حاجة النبي ماعملهاش ولا الخلفاء الأربعة:
سيدنا أبو بكر، سيدنا عمر، سيدنا عثمان، سيدنا علي.

الاتنين وثلاثين سنة بتوع الخلافة الراشدة حصل فيهم احتفال بالمولد النبي احتفل النبي أمر يقول لك أه النبي احتفل،
حاضر والله العظيم أنا موافق على الاحتفال اللي عمله النبي إن هو صام لما سُئل عن صيام الاثنين قال هذا يوم ولدت فيه وفيه بعثت
فالنبي احتفل أنا موافق جدًا معاك قول لي سنة وأنا أول واحد" قُلْ إِنْ كَانَ لِلرَّحْمَنِ وَلَدٌ فَأَنَا أَوَّلُ الْعَابِدِينَ" الزخرف:81
اللي هيقول لي أن النبي احتفل أقول له أنا وراء النبي وراء النبي "حذْوَ القُذَّةِ بالقُذَّةِ" صححه الألباني، أشهد الله العظيم أن بالحرف
بالــــ "حذو القذة بالقذة" وراء سيدنا النبي، احتفل يعني إيه؟ يعني صام يوم الاتنين ..

أنا مستعد أصوم يوم الاتنين،
لكن هل النبي -صلي الله عليه وسلم- تحرى يوم اتنا عشر ربيع بالصيام؟ يقول طيب ايش دراني ما يمكن عمل ..لا هنا الخطر بقى
اسمعوا الخطر ده معلش علشان والله أنا بأحبكم في الله يا جماعة زي واحد قال لي سيب الناس تفرح يا عم!
هو أنا مانع الناس !ما تفرح أنا قُلت كده اللي عايز يركب مراجيح ويلعب وياكل حلاوة وبيعملوا إيه تاني؟
وجمال وحصنه ومش عارف إيه ما يعملها بس مش باسم الدين، بلاش تعمل باسم الدين، بلاش تلعب باسم النبي،
العب هذه من المباحات هو احنا بنقول أكل الحلاوة حرام؟ مباح بس ما يبقاش بإيه باسم الدين، ما يبقاش نسك !هو ده الكلام.

قول لي ده الشيخ فلان قال إنها مش حرام، يا عم أنا ما بأعترضتش على الشيخ فلان، الشيخ فلان قال اللي أنا بأقوله ده
والشيخ فلان موافقني في اللي أنا بأقوله ده تحديدًا لو إنت قُلت للشيخ فلان اللي إنت بتقول لي على اسمه حبيي وأخويا وصديقي وصاحبي وشيخي
وكل حاجة لو إنت قُلت له أكل الحلاوة على إنه نسك يتعبد بيه في يوم المولد يبقى حلال والّا حرام يقول لي ومين بياكلها علي إنها نسك!
إحنا بناكلها وخلاص طيب وأنا قُلت لك إنه حرام؟ أنا ماقُلتش على ده حرام ولا قُلت على ده إنه بدعة
إنه واحد يوم اثني عشر ربيع رايح يركب مراجيح جايب علم وماشي يرقص في الشوارع ما هم رقصوا في الكورة ما يرقصوا بقى
ما هي الدنيا بقت رقص هما حرين بس مش باسم الدين.

إنت لو قُلت لي بقى إن ده دين.. هو ده الخطر! إحنا قُلنا أهو متفقين علشان محدش يزعل مني ولا حد يفهم كلامي غلط
إن الناس اللي بتقول النبي احتفل، أنا موافق، أنا موافق نحتفل زي النبي ما احتفل جدًا وقدامك قبل الكل نصوم يوم الاثنين من كل أسبوع
طول ما احنا أحياء وأنا قُلت كده إن منهجنا احنا نصوم الاثنين والخميس من كل أسبوع ثابت طول السنة ده الواجب اللي بناخده كل أسبوع
لكن لو إنت قُلت إن النبي احتفل وهو مااحتفلش بالطريقة بتاعتك يعني يبقى انت بتكذب عن النبي..
طيب لو قُلت حتى لو النبي ماعملش لنفسه مولد ده كان متواضع نعمل احنا للنبي مولد انت ترضى أن يتهم النبي ترضى؟
قول لي لأ طبعًا أنا ماقصدش التنصير ولا اللمسلسلات الدنية اللي هي بتتهم برضه السيرة والسنة بحاجات عجيبة جدًا ولا سب الصحابة
ولا لا وإنما أقصد أقصدك إنت، إنت تتهم النبي قول لي لأ طبعًا أعوذ بالله! ده أنا بأحبه .

طب صلِّ عليه -عليه الصلاة والسلام -كتر الصلاة على النبي -صلى الله عليه وسلم –قول لي مش بدعة دي يا عم الشيخ؟
لا دي سنة كتر الصلاة على النبي دي سنة- صلي الله عليه وعلى صحبه وسلم- ده قال للراجل أما سأله قال له أجعل دعائي كله صلاة عليه
قال إذا يكفيك الله ما أهمك إذا يغفر ذنبك وتكفي ما أهمك فخلي كل دعائك صلاة على النبي صلِّ عليه -صلى الله عليه وسلم-
أنا أقصد اسمع كلام بن القيم كده يقول ابن القيم- عليه رحمة الله-" وكل من عبد الله ببدعة فقد اتهم رسول الله -صلى الله عليه وسلم-
بلسان حاله واتهم هديه أنه ليس من أحسن الهدي وإن قال غير ذلك بلسانه" هيقول لي لا ده أنا بأتبع النبي، ده أنا بأحب النبي، ده أنا بأعظم النبي،
سيبك من كلامه انت لما تعمل حاجة ماعملهاش النبي يبقى انت دلوقت بتتهم النبي إن فيه هدي أحسن من هدي النبي!
ثم تفاجأ باللي بيقول لك ده أنا بأتبع النبي وأنا بأحب النبي، أنا وراء النبي وإن الناس اللي بتقول عدم الاحتفال بالمولد دول ما بيحبوش النبي
تفاجأ إن هو لا مظهره على هدي النبي ولا سلوكياته على هدي النبي، طيب يعني بص لنفسك عشان ما تتهمش الآخرين،
شوف انت كده شكلًا وموضوعًا هديًا وسمتًا ده النبي! ده النبي؟! النبي كده كان ده هديه في لبسه؟ كان ده هديه في اعفاء لحيته؟
كان ده هديه في تقصير ثوبه؟ كان ده هديه؟ مش ده هدي النبي اللي انت بتزعم !سيبنا من ده..

إحنا بنتكلم دلوقت في هذه القضية تحديدًا احذروا البدعة إيه هي البدعة؟ اللي ماعملوش النبي أنا قُلت كده في يوم من الأيام
يا ناس لو أنا قُلت اللي عمله النبي على عيني وعلى راسي خلاص هأعمله، واللي ماعملوش النبي خلاص ما يلزمنيش الكلام، ده يزعل حد؟
بس في الدين، في أعمال الدين، في أعمال العبادة اللي عمله النبي أنا هأعمله، واللي ماعملوش النبي مايلزمنيش، اللي ماعملوش النبي بدعة
بدليل الحديث":وإيّاكُمْ ومُحدثاتِ الأُمورِ فإنَّ كلَّ مُحدَثةٍ بِدعةٌ " صححه الألباني بالنص ده الصحيح الصريح،
هتدخل بقى الناحية التانية تلاقي الشبهات والأهواء، الصحيح الصريح " إن من يعشْ منكم فسيرى اختلافًا كثيرًا فعليكم بسنتي
وسنةِ الخلفاءِ الراشدينَ المهديين من بعدي عضوا عليها بالنواجذِ" صححه الألباني ده الصحيح الصريح.

خطورة البدعة:
1- أنك تتهم رسول الله أن هَدْيَه ليس أحسن الهدي.
2- اتهام الإيمان:
قال الله جل جلاله "وَمَن يُشَاقِقِ الرَّسُولَ مِن بَعْدِ مَا تَبَيَّنَ لَهُ الْهُدَى? وَيَتَّبِعْ غَيْرَ سَبِيلِ الْمُؤْمِنِينَ" النساء:115
احنا قلنا قبل كده في قصة المولد إن الاحتفال بدأ خمسمائة وحاجة هجرية يعني عدى على المسلمين أكتر من خمسمائة سَنة
لا يعرفون شيئًا اسمه المولد ولم يسمعوا عنه قط، خمسمائة سنة هجرية، أكتر من خمسمائة سنة، خمسمائة حاجة وأربعين يبقى ده الإجماع،
النهارده اللي بيتكلم النهارده في جوازه وبيرجع تاني يقول الأئمة الأربعة والفقهاء الأربعة والسلف، طيب انت فين من السلف؟.

3- التوعد بالفتنة:
قال الله جل جلاله " فَلْيَحْذَرِ الَّذِينَ يُخَالِفُونَ عَنْ أَمْرِهِ أَن تُصِيبَهُمْ فِتْنَةٌ أَوْ يُصِيبَهُمْ عَذَابٌ أَلِيمٌ" النور:63
ده تحذير شديد من الله العظيم" فَلْيَحْذَرِ الَّذِينَ يُخَالِفُونَ عَنْ أَمْرِهِ " لما واحد قال للإمام مالك: الرسول أحرم منين؟،
قال: من ذي الحليفة، قال: أما أنا فسأُحرم من بيتي" الراجل بيحتاط أحيانًا بنطلع الطيارة ونقول للطيار يا عم الحاج بلاش يا عم الحاج
يا أستاذ يا باشا يا كابتن عند الميقات ابقى قول لنا، بيحصل كده أنا بأُعاني زيكم إن هو يقول باقي على الميقات نصف ساعة
وبعد كده ما يتكلمش تاني فكده مشكلة عندي، فناس تقولك أنا أحتاط فأنا أول ما أطلع الطيارة ألبي وخلصنا
وييجي الميقات وقت ما ييجي، الكلام ده خطأ برده خطر ينبغي عند الاحتياط ألا تخالف السُنة..
أنا بأقول الاحتياط بقى إن هو يقول فاضل على الميقات نصف ساعة أنا هأنام أنا هأنشغل أنا هأكسل ممكن بقى ساعتها أفكر كده
إنها قبلها بشوية ألبي ما يجراش حاجة ما احنا في الهوا في الجو في الطيارة لكن عشان ألبي من بيتي لما الراجل قال للإمام مالك فتنة
قال له: "أخشى أن تصيبك فتنة أو يصيبك عذاب أليم"

4- أن الله يحجب التوبة عن كل مبتدع :
عشان كده تلاقي اللجَاجَة، اللجاجة هييجي معانا النهارده في السيرة إن ربنا سبحانه وتعالى قال للسماء والأرض
" ائْتِيَا طَوْعًا أَوْ كَرْهًا قَالَتَا أَتَيْنَا طَائِعِينَ " فصلت :11 المسارعة في الاستجابة، "إِذْ قَالَ لَهُ رَبُّهُ أَسْلِمْ قَالَ أَسْلَمْتُ" البقرة:131
طالب الحق، هكذا طالب الحق سريع الفيأة، نقول له بدعة يقول أعوذ بالله! ويترك وخلص الموضوع وانتهينا،
طيب نقول له حرام .. يترك خلاص انتهينا حرام خلصت، مش يقعد يدور بقى حرام ليه، وحرام جامد يعني ولا حرام نص نص،
ويسأل يمين وشمال ويحاول يتفلت من هذه الكلمة حرام، مش ده عمل المتقين،
المتقون تركوا بعض الحلال مخافة الوقوع في الحرام، ده كان بعضهم يخرج من المسجد يمسك إيده ما لك؟
يقول: أخشى أن تنافق يدي، هزة الإيد وهو ماشي خايف لينافق!

كان عبد الله بن مسعود-رضي الله عنه- يقول "لا يجعل أحدكم للشيطان حظًا من صلاته أن يحرص ألّا يلتفت إلا عن يمينه،
لقد رأيت رسول الله- صلى الله عليه وسلم- يلتفت عن يمينه ويلتفت عن شماله" يقصد بعد التسليم ألف يمين والّا ألف شمال؟
أهي دي بقى اللي بنقول فيها للي هو بيقول ما تحبكهاش، أهو في الموقف اللي زي ده أقول له ما تحبكهاش،
لما ما تحبكهاش سُنة، لكن أحيانًا تحبكها سُنة، مش بيّ، مش مزاجي، مش هوايّ، مش تشددي، مش لا لا لا ده الدين الدين،
الشاهد قال رسول الله- صلى الله عليه وسلم- "إنَّ اللهَ حجب التوبةَ عن كلِّ صاحبِ بدعةٍ حتى يدَعَ بدعتَه" صححه الألباني
إن الله احتجز التوبة عن كل صاحب بدعة أصل صاحب البدعة شايفك انت بعين التقصير هو بيقول لك انت اللي مقصر،
انت اللي ماعملتش عشان كده طلع النهارده في التليفزيون يقول لك ده اللي مايحتفلش هو اللي مبتدع،
إنا لله وإنا إليه راجعون، رمتني بدائها وانسلت، صاحب البدعة في لجاجة في الكلام، في لجاجة في الحوار.
"فَلْيَحْذَرِ الَّذِينَ يُخَالِفُونَ عَنْ أَمْرِهِ أَن تُصِيبَهُمْ فِتْنَةٌ أَوْ يُصِيبَهُمْ عَذَابٌ أَلِيمٌ" النور:63
من العذاب الأليم:

5- حبوط العمل
قال رسول الله -صلى الله عليه وسلم- "من عملَ عملًا ليسَ عليهِ أمرُنا فهو ردٌّ" صحيح مسلم مردود حابط.
6- النار
" وَمَن يُشَاقِقِ الرَّسُولَ مِن بَعْدِ مَا تَبَيَّنَ لَهُ الْهُدَى? وَيَتَّبِعْ غَيْرَ سَبِيلِ الْمُؤْمِنِينَ نُوَلِّهِ مَا تَوَلَّى? وَنُصْلِهِ جَهَنَّمَ وَسَاءَتْ مَصِيرًا" النساء:115
7- رضا ربنا يفوتك إذا فوت سُنة النبي
"قُلْ إِن كُنتُمْ تُحِبُّونَ اللَّهَ فَاتَّبِعُونِي يُحْبِبْكُمُ اللَّهُ وَيَغْفِرْ لَكُمْ ذُنُوبَكُمْ وَاللَّهُ غَفُورٌ رَّحِيمٌ" آل عمران:31

أخطرها وبها نختم: أن الذي يبتدع ويغير من هدي النبي- صلى الله عليه وسلم- لا ينال شربة الحوض في الموقف
ليَرِدَنَّ عليَّ أقوامٌ أعرفُهم ويعرفونني ، ثم يُحالُ بيني وبينهم" –الرسول شايفهم فيهم علامة الصلاة غُر محجلين من آثار الوضوء
" فأقولُ: إنهم مِنِّي" -دول من أمتي هاتوهم – "فيقال إنك لا تدري ما أحدثوا بعدك فأقول سحقًا سحقًا لمن غير بعدي " صحيح البخاري
ترضى إن يزاد بك لأنك بدلت وغيرت، لأنك حدثت في برامج السُنة، حدثت في أوامر السُنة،
حدثت في أعمال السُنة، مش مطلوب تحديثه، خليه على أصوله،
نسأل الله لنا ولكم العفو والعافية.

المصدر...
ساعد في نشر والارتقاء بنا عبر مشاركة رأيك في الفيس بوك