افكر بالطلاق ادور استقرار واستقلال

[ربيع الفردوس الاعلى و روضة القران]

افكر بالطلاق ادور استقرار واستقلال

السلام عليكم
انا امراءه متزوجه منذ15عام
عمري33
عندي ولدين13سنه والثاني8سنوات
وبنت سنتين ونص
تزوجت بعمر17
زوجي عمره الان40

أخوتي من خلال اطلاعي الدائم والمستمر للمنتدى
وكثرة المشاكل الزوجيه وتحمل اعبائها
وجدت نفسي في حيرةً من امري
مره أشوف نفسي اهون البائسين
ومره اقول لايكلف الله الا وسعها

كل ماقريت موضوع فيه شي منه يلامس حياتي
اكيد الطلاق ابغض الحلال بس انه حل وحلال..
مشاكلي مايسعني ذكرها كلها
لكن مريت بكل المشاكل
((اهانه وضرب وشك وتدخلات اهله وسب لاهلي وبخله ))

وكلها تمر فتره وبمشكله وبعدها نوعاً ما ينصلح الحال
وكل سنه مشكله وتوتر

بس المشاكل انهكتني وكرهتني حياتي
مافي فتره تمر بسلام

بصراحه انا زوجي يمكن اربع مرات ضربني واخذت موقف وكنت حازمه معه ولاعاد ضرب..

بس فيه اهانات لفظيه منه بشكل دائم وقلة احترام سويت كل شي عشان يتعدل ومانفع..
مقصر بواجباته اتجاهي واتجاه اولاده الا ماندر..
ماااااااااايحتوي عياله قسم بالله يمر اسبوع اسبوعين مايبوسهم ولايحضنهم كل كلامه لهم اوامر..
نغيب عنه مايفتقدهم
يخاطبهم بصوت عالي جداً ويشرشحهم بكلامه
حتى بنتي عمرها سنتين ونص والله يصرخ عليها تقولون كأنها بالغه ويلعنها ويتذمر منها وهذا اعتبرها اقرب وحده له ويعاملها كذا..

حياته عشوائيه بيتنا دايم مفتوح عيالي كنهم مشردين ماغير اطارد وراهم من عند عمهم الي جدانهم واحيان بالحوش وانا اقلق عليهم وهو لاعادي ..

مهملهم حتى صحياً ..
حتى تعامله لاهله جداً مبتذل وسيء واولادي يشوفون ابوهم وجدانهم واسلوبهم والله العظيم ماعندهم خطوط حمراء بالكلام ولا في الخصوصيه

تقدرون تقولون ماني مستقله ولا مستقره
غير انه زوجي اناني ومايحاول يجتهد لحياته واسرته
مايطلع من البيت نهائي الا لمشاوير البيت او فره بالسياره يغير جو
يتذمر اذا طلبته مشوار او سوق او اروح لاحد او احد يجيني
هو يبغاني للبيت طبخ ونفخ وللعيال الام والاب وله زوجه لفراشه..
هو فيه صفات حلوه لكنه يخربها بسلبياته

((سريع الانفعال سريع الرضا الحمدالله يحافظ على صلاته بينه وبين اهلي احترام متبادل ولااحيان من وراهم يسب رغم اهلي معه يحبونه ويعزونه لاني ماقد شكيت منه وكذالك يجيب مؤونة البيت لانه يحب اكل البيت))
هذي الاشياء الحلوه
يحبني بكلامه لانو اذا سالته يقول ايه احبك لو ماحبك ماتكوني على ذمتي

بس افعال تترجم الحب والله مافي ابداً لا اهتمام ولا احترام
يهين ويغلط ويسب ولايقدر قدام اي احد عادي سواء لي او لاولاده..

حتى عيالي عنده يرفعون صوتهم عليه يقولون حتى هو يرفع صوته على ابوه
وبابا بس يهيين فينا ويسبنا افهمهم حرام ذا ابوكم
يرجعون يقولون هو كذا معا ابوه وماهو حرام

هالشي يزعجني اذا كان الاب صراخه وسبه ماجاب به شخصيه بل هدم شخصيته قدام عياله واصبحو كلمه بكلمه اولادي مايغلطون لفظياً
ولكنهم يبررون لابوهم احنا مو غلط ماسوينا شي انت تظلمنا انت ماتحبنا وووو


الحمدالله معايه لا لاني اعاملهم باحترام وود وتقرب ووقت الخطا يوجد عقاب حازم

انا تحملت الاعباء كلها لكن من كثر ما استشرت والله استشاريين اسريين وتربويين الكل اجمع انه طبع فيه مستحيل يتغير
وانا مستحيل اقدر اتحمل
توتر وصراخ اغلب اليوم وماهو متعاون بالتربيه
اعرف معظم المتزوجات كذا
لكن الحال ذا لامتى؟؟؟؟؟؟؟
كنت اتأمل انه يتغير سلوكياً معانا ونعرف نكمل مشوار حياتنا لكن للاسف15سنه ماتحسن منه الا10٪

فكرت بالطلاق لانه مهملني بجميع النواحي والله

وغلط غلطه وبناء من الغلطه هذي قررت اتركه
وش الغلطه انو اخذ مبلغ مالي خاص فيه دون علمي ولاهي اول مره يسويها

كرهته تلووونه في دينه وشخصيته مالي شخصيه محدده ومعينه
رحت لاهلي اعطيته اخر فرصه قلت له اما تنفذ الشروط واما الطلاق..

وكانت شروطي تحافظ على بيتك وخصوصيته-تساعدني في تربية عيالي تربيه صحيحه-ماتزعل في حال طلبت مشوار او زياره-تمتنع عن طلب الجماع الخلفي-مصروف شهري خاص فيه
بعد اسبوع وافق
وجا اخذني
ولكن ماتغير شي والله
الا شي واحد انه اهدى بشوووووووي بس
قلت حصبر شهرين ذي واشوفه

لكن دائماً ما اقرا ان الطلاق صعب ويكون للحالات الحرجه اما ((خاين واما مدمن واما سليط بالضرب المبرح او هاجر زوجته وكأن الطلاق شرع للاسباب هذي))

الرجال لو لقي تقصير واهمال وتسلط من زوجته يقدر يفك هالضيق ابسطها يتزوج مسيار وسراً وقدر يسعد نفسه ويمسك بيته

لكن وضع الحرمه
تتزوج عشان تجيب عيال وتشتغل لزوج وتصبر عشان عيالها وعيالها بيكبرون يشوفون حياتهم
والزوج مرتاح حرمه تأكله وتشربه وتخدمه

انا انسانه عاطفيه احب المشاعر ولا اقصد بالمشاعر الغزل الدائم
لا اكيد هذا له اوقاته رغم جماله اني تنازلت عنه

اقصد يقدرني يثني على تعبي يشكرني على جهدي
يدعيلي يقبلني
والله القبله منه ما اعرفها ولا الحضن ولا لمسات الحنيه
ابيه يعين عيالي على احترامي وبري نفس انا ما اسويه لعيالي كل كلامي شكر لابوهم وتعظيم له ولازم تبرونه حتى لو غلط عليكم يبقى ابوكم


اذا تعبت ابي اشوف اهتمامه خوفه وحرصه..
اذا فرحت يشاركني فرحتي وسعادتي..
اذا حزنت يخفف عليه..

مالقيته منه شي والله جاف جاف جاف جاف جاف جداً
والله الحين اذا احد مدحني من برا
اول شي تدمع عيوني
اخوي ارسل فقدتك ياالحبيبه لك جو ببيت اهلي
ماعرفت ارد بكيت
اخواتي اذا مرضت شفت اهتمامهم والله اني ابكي
جد فراغ بحياتي كبير جداً
انا حياتي معاه حياة شغاله والله طبخ نفخ تربيه
سوالفنا ممله
طلعتنا اغلبها فره بالسياره او مطعم ناكل ونمشي
مافيها مزح ولا لعب ولا احتواء

معقوله حياة الاغلب كذا ؟؟

انا ابي الطلاق ابي استقل بذاتي ولعيالي ما ابي اكون شغاله لرجال وبالنهايه اناالضحيه انا لازم اشبع الكل واعطيهم حقوقهم
واما حقوقي بس تنعطي في الاكل والشرب والبس ليه؟؟

ليه العالم تخوفنا من الطلاق وتحوله لشبح مخيف
ليه الطلاق كأنه باب هم اذا انفتح انهلت المخاوف والهموم امامه

طيب لو تحملت وصبرت نفسي الي تتعذب مايسألني الله عنها
لاني والله وصلت مرحلة الكرهه لزوجي هو من حدني افكر بالطلاق
لاني اعطيه كل شي بكرهه

حسبت لو تطلقت((راح استقل بجناح عند اهلي_وراح يرسل مصروف لعياله لانه مقتدر مادياً_راح اكون في هدوء انا وعيالي_ابي اشتغل على نفسي وتطويرها وانمي طموحي_اهلي ناس فاهمه الحمدالله_ع الاقل اكون سعاده لنفسي ولعيالي))

ومع هذا وذاك
لازلت بحيره
اما الرحيل او البقاء
15سنه راحت من عمري كلها بناء امال وولكن خابت
كل يوم اقرا المشاكل واقرا ردودكم وابقى على حيرتي
اغلب المشاكل تتشابه
والحلول ايضاً لصالح الرجل دائما

حاوريه -ناقشيه-علميه- سانديه-تقربي_توددي
دلعيه وووو
حتى باتت المراءه اسيرت همومها

طولت عليكم ولكن اعباء الحياه ماجعلتني اسرد لكم جزء من همي

شكراً للجميع

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

ht;v fhg'ghr h],v hsjrvhv ,hsjrghg

اضغط هنا للذهاب لعنوان موضوعنا...
ساعد في نشر والارتقاء بنا عبر مشاركة رأيك في الفيس بوك