شبكة ربيع الفردوس الاعلى - مشكلة التعرق الزائد هل من حل لها ؟

مشكلة التعرق الزائد هل من حل لها ؟

السلام عليكم ورحمة الله وبركاته

صارلي 7 سنوات وأنا في المعاناة هذي وما لقيت لها حل نهائي الى الان ..؟

هل فيكم احد يتخيل اللي قاعد اعيشه الحين ولا اقولكم ؟

مشكلتي هي فرط التعرق بمنطقة اليدين والرجلين والإبطين .. كل ما مسكت الجوال يجيه عليه عرق .. كل ما جلست على اللاب توب وحطيت يديني عليه يجيه عليه عرق ويتوسخ اللاب توب .. كل ما سقت السيارة ومسكت الدركسون يتعرق .. كل ما وقفت عند مرايه وأنا لابس ملابسي ما صار لي ساعه ولا ساعتين اشوف شلال تحت اباطي .. كل ما لبست نعال اعزكم الله اتزحلق منها بسبة هالعرق .. بتقولون لي ليش ما تلبس كنادر اقولكم مشوار علي كل شوي لابس ومنزل الكنادر يصير كل يومي على الكنادر الا لمن اجي انام انزلهم هم والشرابات .. كل حطيت يدي على ورقة الاختبار ورفعت يدي الورقة تقول منكب عليها مويه .. كل ما صافحت احد يقولي وش فيها يدك معرقة؟ وللحينها يدك تعرق ؟ ويدك معرق ومن الكلام هذا اللي يدبل الكبد ويرفع الضغط ويتعب نفسيتك .. سامحوني بس بقولكم شي وأتمنى من اي واحد فيكم ما ينقد علي او يزعل بسبة الحاجة اللي بقولها الحين ..
لو تزوجت وجيت بلمس زوجتي وأداعبها وأنبسط معها وحست بيديني انهم معرقات ساعتها بتنقد علي طبعا وتقول وش فيهم معرقين وليش انت كذا وتتقرف مني وانا ساعتها بنحرج وبتضايق ويعورني قلبي من هالموقف ... يعني بالله عليكم لو تزوجت ان شاء الله وصار معي هالموقف .. بالله عليكم وش راح اسوي ؟ بتقولون لي ما تدري يمكن بالمستقبل يكتشفون علاج لهالمشكلة وتنهي معاناتك ومعاناة غيرك .. السكري وفرق الدم وغيرها من الامراض طلعت قبل اكثر من 500 سنة ومالقوا لها علاج الى يومك هذا ! مع ان الطب كل ماله يتطور وكل شوي طالع لنا مرض جديد زي اللي منتشر هاليومين مثل كورونا وغيرها وتبونهم يلقون حل لمشكلتي هذي ؟؟
بالله عليكم يا جماعة الخير هل انتم مصدقين ان فيه علاج يقضي على المشكلة هذي نهائيا ؟
طبعا انا ماخليت طبيب جدلية وجراحة وتجميل في الشرقية والرياض وحايل وفي اكثر من منطقة حتى من امريكا ماخليت دكتور سواء اخصائي او استشاري ما كلمته وتناقشت معه عن هذي المشكلة .. كلهم قالوا لي ان المشكلة هذي سببها اما نفسي او زيادة لإفرازات الغدة الدرقية بعد مرحلة البلوغ .. وأنا لجل احل المشكلة من الناحية النفسية رحت عند اخصائي نفسي وأخذت معه جلسات لين 8 شهور وقالي انت انسان طبيعي الحمدلله ومافيك شي ويمكن التعرق اللي فيك سببه زي ما قالوا لك الاطباء زيادة افرزات الغدة الدرقية .. طبعا على كلام الدكاترة اللي جيتهم بالمستشفى واللي كلمتهم على النت قالوا لي استعمل كريمات .. استعملت كريمات ولا فيه فايدة مفعولها ما يخفف ولا 10% من نسبة التعرق وكل ما احطه ياخذ له شويات ثم يرجع لي التعرق مره ثانية .. يعني مامنها فايدة الكريمات ابد ابد ما كأني استخدمتهم .. قالوا لي نسوي حقن بوتكس وسيوتها مع انها افضل من الكريمات بكثير لكن يعيبها 3 اسباب : مكلفة ماديا نقرتين لعرض الصورة في صفحة مستقلة الحقن مؤلم نوعا ما نقرتين لعرض الصورة في صفحة مستقلة مفعولها مؤقت من 3-6 شهور فقط وبعد ذلك ترجع وتسويها من جديد لكنها ماتصلح ابدا وماني فاضي كل ما خلصت مفعولها رجعت وسويتها من جديد غالية عالي وتعور بصراحة ومفعولها مؤقت .. قالوا لي الدكاترة دام مانفع معك لا هذا ولا ذاك مالك الا عملية قطع او تدبيس العصب السمبثاوي قلت لهم له لها اضرار جانبية قالوا نعم تسبب لك جفاف في يدينك ورجلينك كأنهم يدين ورجلين شايب يصيرون ناشفات والعصب هذا بيفيدك كثير وما ننصحك تسوي هذي العملية .. قلت لهم مافيه حل ثاني قالوا فيه حلول مؤقته زي الشبة مع البودرة تفركهم وتحطهم على المناطق اللي فيها تعرق او تغلي مويا وتحطها في قدر او وعاء كبير وتحط فيه شاي وتغمس يديك ورجليك ونفس الطريقة مع الحنة وخل التفاح وغيرها من الحلول اللي قالوا لي حتى وزني نقصت منه 7 كيلو في اقل من سنة مع اني مو سمين بس فيه كمية دهون بجسمي والمشكلة جتني يوم عمري 15 مع ان مالها علاقة بجسمي لأن وقتها كان جسمي ضعيف والحين زي ماقلت لكم ماني دب ..
طبعا استعملت كل الحلول اللي قالوها لي الدكاترة ما خليت حاجة ما سويتها
بالله عليكم وش تبوني اسوي بالله عليكم يا اخواني بالله قولوا لي وش الحل مع مشكلتي اللي ذابحتني ومعورة قلبي .. بالله تكفون وش الحل معها
والله العظيم ان في ليلة 27 من رمضان اللي فات حطيت سجادتي وصليت ركعتين ودعيت ربي ودموعي على خدي ان الله يشفيني ويعافيني ويرحيني ويريح قلبي منها

ادري اني طولت عليكم بكلامي هذا لكن اللي مافيه هالمشكلة فهو بنعمة الحمدلله .. اما اللي فيه هالمشكلة راح يعرف وش كثر هو يعاني منها بالذات نفسيا لأنها تتعب نفسيتك وتدمرها وتعور قلبك عذاب بحياتك ما شفته

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: سؤال وجواب - منتدى الاسئلة العامة - اجابات

la;gm hgjuvr hg.hz] ig lk pg gih ?