شبكة ربيع الفردوس الاعلى - هل هاذا حب . أم هوس . أم مرض نفسي

هل هاذا حب . أم هوس . أم مرض نفسي

السلام عليكم ورحمة الله وبركاته

اتمنى من ربي ألقى الحل لمشكلتنا الحاليه ومن مر عليه مثل كدا يفيدني ..

بداية المشكلة في أخوي . بحاول اشرح على قد ما اقدر وأتمنى توصلكم تمام.

اخوي اصغر مني عمره ٣٢ سنه وغير متزوج
عندي اخوان غيره اكبر واصغر منه

شخصيته اجتماعي جدا وخدوم ومطيع ومسؤول عن كل حاجه تخص اهلي واخواني .اي شي يخرب بالبيت هو يصلح او يجيب عامل . اي مشوار لأهلي او اخواتي المتزوجات او قرايب واصحاب على طول يقول حاضر . خدووم جدا وكريم .

لكن اذا حس احد غدر او داس له على طرف .يصير انتقامي وشراني .

ادخل بالمشكله
قبل سنه تقريبا . ولد عمنا طلق زوجته بعد عشر سنوات زواج بينهم .
وبسبب مشاكل بينهم وفضايح وكلام كثير وغلطت وشتمت زوجها وو .. الخ . عندها عيال منو عند ابوهم .
هي تطلقت ورجعت بلدها .
وعمي طلب من اخوي يوصلها المطار . وعمي وامي راحو معهم .

من فترة طويلة.اخوي كلمني ( وقتها كان سياحه في اوروبا ) .قالي انا حاب اتزوج
انا فرحت .لأن ابوي من كم سنه نفسو يفرح فيه (هو حبيب ابوي فعلاا .لانو كان راضي الوالد)

صدمني وقال انو يبغى طليقة ابن عمنا
انا انصدمت بجددد .فهمتو ماينفع .ابن عمك .
واحنا عارفين كل مشاكلهم وفضايحهم .وعمي كل يوم يقول يارب ترجع لبيتها وعيالها ومتحسرين بس علشان احفادهم الاربعه

فهمتو الف مرة العواقب وماينفع ووو
لمن يأست بالأخير قلتلو الموضوع عند ابوك

قالي بس اعرف هي حتوافق وكلميها بس اسأليها وجلس يترجاني بطريقة عمري ماشفت اخوي كدا .
قلتلو كلم اهلك . انا في بيتي وفي بلد تانيه ما بقدر اعمل حاجه واهلك مابيعرفو

هو اتصل على امي .وفتح معها الموضوع .طبعاا رفضت رفض قااطع .بعد مافهمتو بالعقل . وانهت الموضوع

بعد يومين كلمني اتصال فيديو . وكان في حاله يرثى لها . وماخذ شريط حبوب ومصور نفسو وعنده شراب ويهدد .بسببكم حعمل كدا .جلست افهمه واصرخ عليه اشد وارخي معاه
مش عارفه كيف اتفاهم معاه وخايفه عليه .لانه بعيد . بالمقابل هو جلس يبكي ويشاهق زي الاطفال واول مره اشوف اخوي يبكي كدا .
وهدد انو ييعمل في نفسه حاجه وماحنشوفه تاني وكدا
هديته وقفلت معاه . وكلمت امي واخواني .

طبعا الوالد ماكلمناه ولاعرفناه .لانو عصبي جداااا
ولو عرف حيقول لا واخوي ممكن يتهور ويأذي نفسه
قلنا بس يرجع اخوي من السفر يكون وسطنا نتعامل معاه ونقول لابوي

جات كورونا . واتحجز في اوروبا ٧ شهور
نزل وزنه ٢٠ كيلو
اغلب وقته جالس وحده بغرفته
كل فترة يكلمني( كان تواصله معي انا لان احنا اكتر اثنين قريبين من بعض ) كان يقولي انا بحلم فيها كل يوم
ما ينام يومين من التفكير . ياخد حبوب منومه
انطوى على نفسه جدااا

يشتري اشياء يقولي جبت دي علشان زواجي
طلع صورتها من الفيس وفصل تعليقة بصورتها
وخطط للزواج والبيت والعفش ووين يعيشو ووين يسافرو ورسم حياتو كلها بعقله . كل ذا قبل لايعرف اذا في نصيب او لا

عدت الشهور ورجع من سفره
وفاتح ابوي بالموضوع .ابو رفض
كل يوم والتاني يروح للوالد .اخطبها لي
ابوي رافض مرررة .برضو ابوي فهمو الوضع وممكن ترجع لطليقها وعندهم امل وو

جلس معاه بالعقل وفهمه وقاله امك تخطبلك من بكرا اللي تتمناها
يقول ابغى فلانه ماغيرها .

مرة من المرات احتد النقاش مع ابوي . اخوي اخذ علبة حبوب
وبآخر لحظه لحقناه وعملوله غسيل معده
ويوم تاني كسر البيت والمطبخ وفتح انبوبه الغاز وهدد يحرق البيت وقطع اسلاك الكهربا . وكل كلامه .ابغى فلانه .

يوم تاني جرح رقبته بالسكين
ويحقن نفسه برقبته ابر كلور
ياخد حبوب كل شوي
يجلس عالشباك نص جسمه برا ونصه داخل .واهلي دور ثالث
يجلس بالمطبخ بالظلمه ماسك ولاعه . يولع ويطفي لوحده كدا
الاشياء دي يعملها وقت مايفتح الموضوع مع اهلي علشان يخطبوها

بس وقت ينتهي الموضوع ويتقفل .يجي يبوس ايد ابوي
واللي خربه يجيب بداله ويصلحو
ويرجع طبيعي جداااا .

اخواني تكلمو معاه وفهموه ان رضا ابوك قبل كل حاجه
اللي يعارضه منهم .يهدد ان ينهيه
واللي يوقف معه .يجلس يبكيله ان يتوسط

اخر موقف صار ان فتح الموضوع مع ابوي
وابوي نفس رأيه
وقتها اخوي صار يصرخ على ابوي من قلب ويقول لابوي الله لايسامحك دنيا ولا اخرة
الله ينتقم منك .وكلام كثيييير
ابوي وقتها انهار وهو معاه سكر عالي . وصار يرجف ويبكي
وابوي يبكي ومو داري عن نفسه انهااار من الكلام اللي سمعه

اخوي وقتها قال خلاص ما ابغاها خلاص والله ما حاخدها
بعد مالوضع هدي وكل واحد راح غرفته وابوي خرج من البيت منهار حرفيااا من الكلام اللي سمعه

بعد ساعتين تقريبا
اخوي راح لامي يقول ابغاها
والا حتشوفو حاجه ماعمركم شفتوها ويهدد تاني

ابوي مرررة مصر انو لا ..
واخواني بعد اللي صار لأبوي بالقوة امي ماسكتهم عن اخوي
البيت متكهرب بمعنى الكلمه

حتقولو خلاص اخطبوها
الموضوع صعب ومعقد
والله ماني حابه اتكلم عنها .بس ماتناسبه نهااائيا
لاتصلي ولاتحترم كبير ولاصغير
لا نظافه ولا فهم ولا احترام
زوجها كانت تقوله ياحقير ياتافه ياوسخ
شتمت حماتها
رغم هاذا كلو حاولنا نقنع ابوي مارضي
انا ابوي مقاطعني شهر لاني قلتله خليه ياخدها وحاولت معاه.

بالله ايش الحل معاه .بجد تعبنااا كتير
وهل في حب بالطريقه هادي المريضه بس لانو شافها لمن وصلها المطار (على كلامه . كلنا شكينا انو في تواصل بينهم .بس الله اعلم)
وهو بيحلف انو لا مابيتواصل

واسفه جدااا عالاطاله

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

ig ih`h pf > Hl i,s lvq ktsd

اضغط هنا للذهاب لعنوان موضوعنا...