السلام عليكم ورحمه الله

مسائكم سعيد بحول ربي وقدرته

انا شاب موظف بمدينه خارج مدينتي ويستحيل علي النقل لمدينتي لعدم وجود فرع فيها وساكن لوحدي وكنت اضغط على نفسي بالادخار وحتى الان جمعت مبلغ ممتاز جدًا يكفيني للزواج وشراء سياره جديده بدون قرض ولله الحمد والمنه
المهم حاليًا ارغب بالزواج ومستعد نفسيًا وماديًا ولله الحمد
زميلي بالدوام رجال كبير من نفس المدينه اللي فيها عملي قالي يافلان اذا عندك طاري زواج بدلك على ناس هنا مشهود لهم بالخير والصلاح وهم جيراننا من سنين وعندهم بنت بعمر الزواج وقالي اذا لك رغبه خلني اكلم ام العيال تجيب رقم امها وخل اهلك يكلمونهم وقالي انا زي مايقول المثل امش بجنازه ولا تمشي بزواجه لكن انا اشوف انك مناسب لاهل البنت وهم مناسبين وترا ام البنت من نفس قبيلتكم


المهم استخرت وققلبت الموضوع براسي وحسبتها اني اتزوج من نفس مدينه عملي افضل لي خصوصًا ان عملي شفتات وكذا
بس مشكلتي حاليًا كيف اقول لامي واهلي عن البنت كيف اقولهم اني ابيكم تخطبون لي البنت هذي اخاف يشكون فيني اني متعرف وكذا وبنفس الوقت ماودي اكلم الرجال اقوله جيب الرقم ثم اكلم اهلي ويرفضون

ابي الحل ابي طريقه كيف اقول لاهلي وكيف اقولهم عن البنت علمًا اني اكبر واحد من اخواني ولي ثلاث خوات اصغر مني متزوجات ولكن عادي مافيه ميانه بيني وبينهم