شبكة ربيع الفردوس الاعلى - تفكيري تعبني :( ابي اخطب

تفكيري تعبني :( ابي اخطب

السلام عليكم ورحمه الله وبركاته ,, اتمنى من الادارره عدم تجاهل موضوعي نزلوه

الاعضاء الكرام عذرا ع الاطاله والله ادري كثير الكلام بس كلام في صدري اتمنى من الله ثم منكم تقرونه و تكتبون تعليق يناسب لاتجاملون و ادعوا لي و لاني ناسيكم..

بدايتاً عمري 26 سنه والحمدلله اموري مناسبه للزواج من كل النواحي , تعبت ي اخواني وخواتي وانا ابحث عن زوجه مناسبه الاقارب مافيه احد ماشاء الله يتزوجون من اعمار صغيره جداً وخواتي مالقوا احد مناسب من حولهم ,, الى الآن شفنا 6 بنات بدون مبالغه 5 منهم تفكيرهم جداً ماعجبني يعني كلهم من كلامهم استشفيت ان همهم الوظيفه فقط ولهم نوايا كشف عن الوجه و فيه نظرات تحدي بينها وبين امها و دعوات الاهالي بالثبات بنبره صوت شبه يائسه تكسر الخاطر , و انا صدقا مامانعت عادي بالعكس ابيها تشتغل ولا تجلس مقابله 4 جدران و تنكد علي و على نفسها و عادي لو تسوق ماني رافض الفكره بس مابي مكان مختلط!! و كلامهم من الطريقه الحديثه اللي يكون فيها كبر وكأن مو عاجبها شي وهي تتكلم اتنرفز جداا من هذي العينات وهي اللي سائده اللحين في الجيل الجديد! عجزتت ابلعهم والله العظيم ان وحده من خواتي نفس الحركات هذي اني ماقدر احط عيني بعينهاا لان بتصير مششكله و بتهاوش معها لو استمرت ع هالاسلوب و عجزت اغيرهاا تعاملت بكل شي طلعتها مشيتها سولف معها ضحكناا نبهتها ناقشتها بس باقي ع نفس الاسلوب والكلام اللي فيه وقاحه ماخذينها بأسم قوة الشخصيه!! ..

ابي انسانه تكونن هاديه عاقله رزينه مثقفه ما ازكي نفسي لكني الحمدلله امتلك هذي الصفات بشهادة من حولي الهدوء والرزانه الثقل التفكير الثقافه..

صدقاً تعبت والله مافيه الا وحده هي اللي حصلت فيها اللي ابي واللي اشوفها فعلا زوجه من اصل 6 ولا فيها من زود جمال اهلي كانوا رافضين يوم شافوها يقولون عااديه البنت جدا جدا و اقل بعد لكن رضيتت والله فيها و وقفت ف وجه كلامهم كله عشانها ملتزمه جدا البنت و حافظه لكتاب الله و رفضوني ولا سألتهم وش السبب بس اعتقد لاني مو ملتزم لان طلب مقابلتي ابوها وجلست معه و كنت صريح لابعد الحدود سأل عني قبل لا اجلس معه و سمع كلام جداً ممتاز اني محافظ ع صلواتي كامله و ومطوع ولاهي فخر الله يهديني وجميع المسلمين الكلام مو صحيح مع الاسف مقصر شوي ولا اعتبر مطوع ابداً اخلاقي جدا كويسه مع الجميع ولا اسب ولا اشتم حتى مع اعز اخوياي ولا ادخن بس ما اعتبر مطوع!! حليق و مقصر في صلاتي و اسمع اغاني وعادي الافلام ما اندرج تحت مسمى مطوع بتاتاً

اللحين مدري وش اسوي والله لي فتره 9 شهور نبحث مافيه شي ولا فيني صبر اكثر من كذا لان موضوع الانتظار بحد ذاته مررررهققق و متعب جداً من كل النواحي حتى اهلي ادفهم دفف عشان يتكلمون مع الخطابات و يسألون ووو... ما كأني ولدهم و المفروض مبسوطين و متحمسين اكثر مني وانا اللي اتغلى !! شعور صعب صدق و احس بضغطط مو شوي و شعوري يقول بوصل لمرحله اني اوافق ع اي شي و بسلك لنفسي ع اساس ان الموضوع عادي وباكلها بعدين ..

اختي يوم يأست في الاخير قالت انت قديم بصريح العباره بنات الجيل هذا مايبون واحد مثلك ولا انت تبي وحده مثلهم طبعاً داخله علي الساعه 1 في الليل قبل ارقد بعد ما رحنا نشوف اخر ناس قالتها في وجهي وطلعت كنها صفقتني كف طيب بدون اي حلول جلست في حيره هو صدق الجيل كله صار كذا فجأه !! مضطر اني اوافق ولاني متوافق معهم .. والزواج سنه الحياه والواحد الى متى بيصبر مع فتن الوقت هذا ..

دلوني على طريقه ولا شي يطمن قلبي والله اني شايل هم هالزواج والبنت اللي بتدخل علي في حياتي لاتكون نفس هالعينات المنتشره و المشتهره و اللي اشوفهم في الاسواق :( ابي زوجات اول , يضيق صدري اذا دخلت مواضيع قبل 6 سنوات و اشوف مشاكلهم ان زوجها مايحب طبخها وانها تحبه و تقدره وهو اللي مهملها ووو ... اللحين المواضيع الجديده خلك قويه اسحبي عليه طنشيه وبيلحقك ارفعي عليه قضيه لاتعطينه وجه ولا تبينين حبك لان بيفهم انك ميته عليه ووو ... خيييير ليه كل ذا ! ترى ماهي حررب ليه ماخذين الوضع بالحساسيه و الهجوم هذا كله تجي الوحده مشحونه على اطرف كلمه تنفجررر فيك و تطلعك متخلف و رجعي وقديم وكلام ما ينقال ..

قلت لاهلي شوفوا لي لو وحده كبري من 20 الى 26 راضي والله بس اهم شي فيها المواصفات اللي ابي ..

بنات الحلال واللي يبون الستر موجودين لكن بمنقااش وين نلقاهم اللحين :(

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

jt;dvd jufkd :( hfd ho'f

اضغط هنا للذهاب لعنوان موضوعنا...