انا ضحية مجتمع أم ضحية أمي
 

السلام عليكم ورحمة الله وبركاته
سأبدا بعرض موضوعي
انا بنت من محافظه من مناطق الشمال
طبعاً مثل اي بنت بعد ماتخرجت من الكليه تصير لي خطوبات وللاسف مايصير نصيب
مرات يكون فيه شوفه من قبل الاهل و يرحون بدون رد
طبعاً البعض راح يستقرب ليش النظره من الاهل ماهو من الخاطب
" لان ماعندنا شوفه من قبل الخاطب "
عاد هذا طبعهم المخالف للشريعه
المهم انخطبت كثير وسبحان الله يصير اشياء ومايتم الزواج
ومرات حتى ما ادري بالخطبه ويصير الرفض من الاهل
وجت فتره تقريباً الاربع سنوات الاخيره انقطعت الخطاب ومحد يخطب "بعذرهم😅"
و صرنا بس نسمع ان فيه ناس راح تخطب ومحد يجي
ونسمع ناس تطلب رقم امي وبعد محد يجي

عاد هنا امي وسوست وقالت السالفه انه عين و يمكن سحر
ومن هالكلام ( للمعلوميه وصل عمري 34 وعندي خوات اصغر مني )
صرنا نراجع لشيوخ و اللي يقول عين واللي يقول مابكم الا العافيه واللي يقول استمرو على الزيت والسدر

المهم لاني الكبيره صارت امي توجه لي الكلام
واي مشكله تصير تجلس تلومن بالتقصير وانه جتن عين
وتقول انتي ماتقرين قران ماتصلين الوتر

لدرجة قررت افتح مشروع واشتغل والحمدلله الحياة ماتوقف على زواج لكن امي الله يحفظه بكل موقف وكل مناسبه احس تتفشل مني لاني ماتزوجت وقالت وقفي شغل الناس بكرا وش تقول عنك☹

وكل ماتسمع انه بنت الفلان راح تتزوج تقول شوفي الله وفقه وانتي جالسه عندي ( ياربي انا وش اسوي )

نفسيتي تعبت وصرت ارفض حتى اروح لم رقاة وقلت اذا لي نصيب يجي ، و جاء فتره رحنا زياره لم اختي بمنطقه ثانيه
طلعت متفقه مع اختي ان فيه وحده عندهم بنفس المنطقه تقرا وتسوي حجامه وانا مادريت
فجاه قالت يالله وقتها زعلت ورحت بس رضى لـ امي
وبعده صارت نفسيتي تعبت اكثر واكثر
حسيت اني ثقيله على اهلي مع العلم ان ابوي متوفى وانا صغيره

من الغبنه اللي بقلبي
( ارسلت لاخوي الكبير وقلت له بذمتك ماترفض اول خاطب تزوجني وتخليني اروح سوا كان شايب او عايب ) ارسلته له بالواتس لان صعب اقوله له وجه لوجه
اخوي رد علي رد عاقل وقال والله انك منتي ثقيله وانتي ببيت ابوي وامي هذا تفكيره من الحريم الكبار وصعب نغيره كل مانتناقش معه تحس انه نرادده وانه حنا صغار مانعرف ولاتشيلين هم والله راح يوفقك بس تحملي

المهم وصارت مراجعات عند هالحرمه اللي تقرا وتسوي حجامه
انا ماتحملت وجاء ببالي اكلم خطابه تشوف لي نصيب

كلمتها بعد تردد مع اني كنت ضد الزواجات اللي عن طريق خطابه
( بس صرت ضحية مجتمع وكلام مايرحم )

وشافت لي واحد
وخذت الخطابه رقم امي و بعد كم يوم تواصلت امه مع امي وقالت انا ابي اشوف بنتك لاني ابي اخطب لولدي

انا جحدت سالفة الخطابه وجت امه وشافتني واعجبتها
وهو جاء عند اخوي وتكلم معه وقال انه مطلق وعمره نفس عمري بالضبط الفرق بيننا بس يوم

المهم اخوي بعد ما سال عن اخلاقه قال الشور بالنهايه لك

انا استخرت وقلت موافقه
مانعرف عنهم شي لان هم من قبيله ثانيه

من الشروط وقت عقد الزواج كان بيت مستقل وهو وافق
و تم الزواج

علماً ان امه ساكنه عماره بالدور الارضي وفوقهم شقتين
ساكنين اخوانه الكبار
وبعد ماقرر هذا يتزوج قالوا لواحد منهم يطلع وتاخر ماحصل بيت
وجاء زواجنا وهو يشيل اغراضه وما صار ترميم للشقه

و سكنت بـ قسم مستقل بـ استراحه لـ امه
القسم ( غرفه وصاله ومطبخ ومخزن ودورت مياه )

هم فيهم بداوه شوي وحالتهم المادي وسط
وكل ما ازور اهلي تسمعني امي كلام
وانهم بدو وانا اتجاهل الموضوع

وبعد الزواج جت امي زياره لي وبعد ماشافت البيت
صارت تقول لي خليه يشتري بيت او يستاجر
لاتجلسن بالاستراحه
هو شخص كريم كريم بس الماديه صفر😅
لانه موظف شركه

جاء بيوم وانا وهو نسولف قلت اشتري لنا بيت
قال انا ابي اشتري بيت بس مايعطوني قرض لان خاذي قرض من قبل اصبري حتى اخلص منه
قلت طيب استاجر قال اذا ماتبين الاستراحه نروح للشقه اللي فوق اهلي قلت لا

لان امي قالت مثل ماطلعوا زوجة ولدهم راح يجي يوم ويطلعوني من الشقه

المشكله الحين امي صارت قليل تتكلم معي
تصير احداث ببيت اهلي ما ادري عنهن
صرت كاني منبوذه
بالصدفه اعرف احداث من خواتي وامي ما قالتهن لي
حتى لو اتكلم بـ احداث صارت لي او اجيب طاري زوجي قسم بالله ماهي مبالغه انه تصد عني للجهه الثانيه
مرات اقول مدام امي ماهي متقبله هالزواج اطلب الطلاق وارجع
بس اذا رجعت اخاف نرجع لسالفتنا اللي قبل وانه بك عين وتطلقتي و و و

بس بنفس الوقت رافضه فكرة الانفصال لاني حملت
وقلت اصبر اجيب كم طفل لان هم ثمرة هالدنيا
و حرام احرمهم من ابوهم بدون سبب

تكفون اللي عنده كلام يريح او يقنع وش اسوي




اضغط هنا للذهاب لعنوان موضوعنا...