نعيش من الغرباء

[ربيع الفردوس الاعلى و روضة القران]

نعيش من الغرباء

السلام عليكم

مشكلتي من بداية الزواج .. زوجي أقل مني في الراتب بكثير ووضع عايلتنا ماديا أفضل .. تقدم لي وشفنا بعض نظرة شرعيه ووافقنا على بعض .. اعترف لي بعدين انه اثناء الملكة وتوثيق الزواج كان يعرق و يشرب ماي ومتوتر لانه ندم .. لانه الظاهر وافق علي فثط عشةن المادة واهله حمسوه .. قال كل ما كان يبا يبطل اهله يرجعون يقنعونه ويكمل في الاجراءات .. يعني هو مش منجذب لي ومش انا "فتاة احلامه" هو كشخص جميل ويساعد في البيت ويحب عياله .. طبعا الان مر على الزواج ٦ سنوات وصار بينا عيال.

انا بعدين بداية الزواج اعترف بأنه يتمنى شيء آخر في زوجته عرفت من خلال البنات اللي يجذبونه في المولات او الافلام ..

انا كشخصيه جدا محبوبه في محيطي وصح انه كان نافر مني في البدايه بس بعد ما حاول يعرفني وحط مجهود انه ينجذب لي صار يحب يسولف معاي ويحب يطلع معاي .. طبعا هذا بعد اربع سنوات .. لكن للأسف كل مجهودنا تدمر لأنه في نفس الوقت اللي انا كنت احاول اجذبه للبيت واجذبه لنفسي كان يكلم بنات من النوع اللي يجذبه .. اللي يرضي فيه غروره..

اكتشفته وحس انه غلط لما ابتعدت عنه وانه راح يخسر كثير وبدأ يعتذر وتدخلوا الأهل ووافقت بشروط .. وافقت بس لأني اعرف أنه ماكان يحبني وتغيرت مشاعره تجاهي فمستحيل يكررها.. للعلم ان الطلاق ماديا راح يأثر عليه أكثر.. انا ممكن يأثر علي عاطفيا فقط بس مع الوقت بأنسى لأن مافي مشاعر قويه موجوده اصلا. والحمدلله ايماني أن الله دايما ما يرد للمظلوم دعوه فمستحيل نضيع بعد الطلاق ونحن مؤمنين ان الله يرعانا.

مرت سنتين كانت فيها ايام جميله وايام مشاكل بسبب عدم الثقه وهذا شي طبيعي قريت عن الصدمه بعد الخيانه وكيف اقدر اتخطاها وان في ايام بكون فيها غاضبه واتألم وايام ماراح اثق فيه بس على شوي شوي بديت اتحسن وصرت ما أسلم نفسي لمشاعر الغضب واشغل نفسي بدراسه ودوام وهوايات ..

لحد ما طلعنا مره نجيب اشياء للبيت وكان يراقب بنت من بعيد .. اطالع الاقي البنت.. وكانت هي بعد تراقبه.. وكانت مع زوجها .. المشكله قعدوا يتفرجون لبعض فتره طويله وبديت اتضايق احاول اغير مكاننا لكن ماشي يرجع لنفس المكان على اساس بيشوف شي.

سكت وقلت بنتظر اليوم اللي بعده بكلمه عشان ما اتكلم وانا معصبه ..

جا اليوم الثاني وقلت له ان اليوم اللي قبله سويت شي ضايقني كزوجتك وياليت اذا انا معاك تحاول تمسك نفسك..

راح على طول قال هي اللي كانت تلاحقني.. استغربت انه قال بدون ما اذكر الموضوع.. قلت له طيب على الاقل المره الجايه نغير المكان .. بدأ يصرخ ويقول اني مريضه وانه هو جميل طبيعي البنات بيطالعونه ..

انا سكتت ورحت اشوف عيالي .. جا عندي مره ثانيه وقال انتي قبيحه لدرجة انه مافي حد يلاحقك ..

قلت له اولا انا واثقه من نفسي وثانيا ان حد يلاحقني ولا لأ ما له دخل يالجمال. ورحت وخليته ..

قام طلع وقعد عند اهله يومين..

رجع يعتذر وقلت له يعني يكفي اللي يسويه فيني واذا مش مقتنع بشكلي يخليني في حالي وكنت هاديه وأدمع..

سكت .. وخلاني ..

رجع وقال انه ندم انه كمل معاي وانها اكبر غلطه سواها..وانه ما استفاد مني اي شي حتى فلوس ما اعطيه .. قلت له خلاص صار اللي صار شو رايك نعيش مع بعض بس نتكلم في أمور العيال والبيت بس تكون علاقتنا بهالحدود . على طول وافق..

طبعا ما اشوفه في البيت الا بالنادر ..

انا للأسف حبيته لكن حاليا جالس يخف الحب .. بلكته من السناب لان تصويره بس يزعلني .. ما اراقبه ابدا.. واحس ارتحت وخف الحب ..

هل قرارنا بأنه نعيش نفس الغريبين في البيت سليم .. ؟ ولا الانفصال أفضل؟ هل حد جرب يعيش بهالطريقه؟

ملاحظه : اتمنى ما تعطوني نصايح كيف اخليه يحبني لان 🔞 مش مزعجنه بالعكس جدا سعيد من هالجانب لكن اللي يعكر عليه وجهي. دايم يعلق على وجهي قدامي وقدام اهله .. رغم اني اعشق التجديد والتغيير لكن عمليات تجميل مستحيل اسوي لشخص ممكن ما يبقى .. ومستحيل لان اي شي فيه معصيه ممكن ينقلب ضدك ويخرب حياتك. حافظت على وزني رغم الاطفال وماعندي بطن واعشق الرياضه .. اتوقع الرياضه هي اللي تغير مزاجي.. قضيته في وجهي لا يجذبه نوع جمالي.

ونصييييحه اذا بنت ماعجبتك في النظره لا تظلمها وتوافق عشان اهلك او الاحراج..
ونفس الشي اذا رجل ما انجذبتي له في النظره خلااص لا تلعبون بمشاعر الناس

لا يؤدم بينكم هذا الهدف من النظره

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

kuda lk hgyvfhx

اضغط هنا للذهاب لعنوان موضوعنا...
ساعد في نشر والارتقاء بنا عبر مشاركة رأيك في الفيس بوك