خالتي تتنمر عليا كل عيد ، كيف اتصرف معاها ؟
 

السلام عليكم ورحمة الله وبركاته


ترددت كثثير ف طرح الموضوع خفت اني ما اقدر اوصل لكم احساسي ..
لكن تشجعت وتوكلت على الله


انا بنت عمري ٣٠ سنه ، متزوجة الحمدلله وعندي أطفال

عندي خالتي عمرها ٤٤ سنه متزوجة وعندها اطفال ، ساكنه بعيد عننا وبحكم المدارس نشوفها ف السنه مره ، ف العيد فقط
بيننا تواصل ف الجوال وعلاقتنا جدا طيبه

وانا اقرب وحدة لها من بين جميع بنات العيله
تفضفض لي واوسيها ونهرج ونضحك وهكذا

مشكلتي معاها
اننا كل ما تقابلنا ف العيد ( في جمعة العائله اللي ما نتقابل الا ف السنة مره )
تجلس تعلق عليا ، مثلا تقول تخنتي مره ، يابطه ، يالله مره سمنتي
حرفيااا كل هروجها ع شكلي
على لبسي انه ماينفع ولا يصلح
حتى على اسم بنتي تجلس تعلق انه مو حلو وليتك سمييتي مثل فلانه

كل عيد وكل سنه على هذا الموال
والله العظيم اني اشيل همها كل عيد وفعلا يحصل اللي اخاف منه
المشكله اضحك واعدي لها واخذ الموضوع بمزح
بس ماهي راضيه تتوب

واحس نفسي خلاص ماعاد اقدر اتحمل اني اجاملها واعدي لها اكثر من كذا لان صبري نفذ

لي تقريبا سنه خففت التواصل معاها قلت يمكن الميانه الزايده خلتها تتمادى عليا
المشكله لما نكون لوحدنا ماااافيه احلي منها معايا وتمدحني وكل شي
وقدام الناس تنقلب واصير انا هرجتها

العيد هذا والله اني شلت هم و فعلا حصل نفسسس الشي

اول مادخلت ع المجلس وجالسين كل الاقارب لابسين وكاشخين
دخلت سلمت نفس الموال قالت يوووه يا نقش الحناء هذا مايصلح ولاينفع ( وانا جالسه اسلم واعايد ع الجميع )
طبعا ضحكت ومشيت الموضوع عادي

بعدين علقت ع لبسي انه لبس اطفال ومايصلح

وبشرتي تقول ليه بشرتك كذا عدمانه كأنك حرمه ف الاربعين

وبرضو ضحكنا ومشينااا وقلنا يابنت الحلال عيد وخالتك اكبر منك واحترميها

لكن الموقف اللي طعني ف وسط قلبي واحس خلاص ماعاد اقدر اجامل اكثر

قالت لي جهزي سفرة العشاء

واثناء ما اجهز دخل خالي وقال يووه من ورا احسبك فلانه ( اللي هي خالتي اللي اتكلم عنها )
قامت بصوت عالي تصارخ قالت يوووووووووه الله يسامحك انا دبه كذا ؟؟؟؟؟ انا بططه كذاااا ؟؟ اخصصصص علييييك

انا وقتها لا قدرت اضحك ولا اجامل احس جسمي صار حار من شدة الاحراااااج
بس ضحكت مجامله وانا وجهي اصفر وعدى الموضوع بسلام ..


لما راحو كل بنات العيله ، جيت بروح بيتي قامت قالت انا امزح معاك ترا للان اشووفك طفله فلا تزعلي مني!



الخلاصة من هذا كله
انا انجرحت المره هذي جرح عميق

كيف ارد اعتباري ؟

انا مستحيل ارد عليها
عندنا عيب
وجريمة

لكن هل هيا بكذا تكون ظلمتني ؟ ابغا ادعي عليها
ابغا ربي ياخذ حقي منها ويبتليها ف عمرها ويجعلها سيرة ف لسان الناس

ايش ممكن اسوي ؟
اتحسب والا ادعي والا ايش ؟
انا ماني مسامحتها لا دنيا ولا آخرره لكن ايش اقول لربي عشان يآخذ حقي منها ؟




اضغط هنا للذهاب لعنوان موضوعنا...