فضفضة عن تعب السنين
 

السلام عليكم ورحمة الله وبركاته

الله يتقبل منكم ومنا ويزيل الوباء يا رب العالمين

ابي افضفض أو اطرح مشكلة احس ما لها حل غير الصبر يمكن تكون فضفضة لأن ما عندي احد اقول لهم على الي داخلي اكتمه
مشكلتي من داخل اسرتي انا بنت وحيدة بين اخواني الذكور كلهم اكبر مني ابتليت بأم تغير مني وتكره راحتي ما اعرف من وين ولا كيف اطرح مشكلتي المشاكل ماتنتهي يوميا اتعرض الأذى النفسي بسببها أن جيت اساعدها في طبخ ترفض لأنها تعتبرني اخذت مكانها في البيت وان جلست تشتكي لابوي واخواني اني ما اساعدها ولو تشوف بنات اعمامي وقرايبيني وبنات خواتها طابخات ومنزلات بالسناب تقول هذولي البنات مو مثل عندي ولو جيت اطبخ ترفض وتقول انت تاخذي مكاني

طيب أن جيت اجلس عندها وهي تطبخ أو تحشي محاشي تقلب علي وتقول انتي جاية تراقبيني تحسبيني خدامة اطبخ لكم وان تركتها لوحدها تشتكي لهم اني عاقة ما اجلس معها
بعد ما اخلص شغل البيت تناديني غسلتي هذا ولا لا واقول نعم وتفتش وتطلع لي اي شغلة

إن عطاني والدي فلوس أو تشوفه لطيف معي تعتبر أن تصرفه إهانة لها .. وان طلعت اتقضى مع والدي بالسوق تزعل وتصير مشكلة كبيرة وتضربني وتدعي علي.... قبل ما اروح اتقضى مع والدي استأذن منها واذا رجعت تقول ما استأذنتي مني وتصير بعد مشكلة كبيرة

ترفض ارافقها بأي مكان للنزهة أو السوق تعتبر هذا خصوصية وانا اشوف كل بنات قرايبنا يطلعون مع امهم كل مكان .... اذا ابي اطلع محتاجة شي ضروري هي تبطل تطلع واذا رجعت تصير مشكلة ليش تطلعي وتعرفي اني ابي اطلع

تطلب مني ارافقها بس اذا تبيني اساعد في شي في المشوار

انا يا جماعة على هذا الحال كل يوم كل يوم من يوم ما كبرت واعيش معاناة الغيرة والشك والتهم تتهمني بكل شي لو شي مكسور لو فرض من اغراضها ضايع تشك حتى اني اكون اضمر لها الشر

انا وصلت بالتفكير اروح اشتري علاج نفسي اوكله لها بدون لا تدري

انا عمري ٢٦ سنة
هادئة جميلة وخلوقة ومحبوبة بشهادة الجميع اشكر الله
مخطوبة وهذا الامل الي مخليني اصبر أكثر واكثر واكثر كل شوي اقول هانت




اضغط هنا للذهاب لعنوان موضوعنا...