انا تعبت من حياة توني مابديت فيها
 

السلام عليكم
الوالد والوالدة متزوجين زواج تقليدي
شخصياتهم مُختلفة تمامًا وانا لما اقصد تمامًا بمعنى
ان الي تبيه امي من ابوي كرجل وزوج موموجود فيه
وان الي يبيه ابوي من المرأه موموجود عند امي
بالاضافة الى احتقار كل واحد فيهم لتصرفات الثاني
انا الكبيرة وكنت احس بهالشيء ايام طفولتي بس ماكنت اشوف
لين صار انفجار كبيروهالانفجار يمكن ما اثر بامي وابوي كثر
ما اثر فيني انا واخواني
نظرات الكره والازدراء
نظرات التقزز
استنقاص سخرية
كل شيء يخطر على بالكم صار
لين جاء اليوم الي شفت امي تبكي قهر بسبب ابوي كلام ابوي عليها
قدامنا
هالكلام صار وعمري 14 سنة
الان عمري 22 لكن يعلم الله ان قلبي يحمل له من الحقد
والغل والكره يمكن حتى الارض والسماء مجتمعه ماتوسعه
كله من تصرفاته ولا امي! حاولت بشتى الطرق تحببني فيه
وان الي سواه يمسها هي فقط واحنا مالنا دخل
طبعًا اعلنها قدامكم انا اظهر كرهي له علنًا.. لكن اكتشفت
انه يردها لامي اضعاف، "بسببك العيال كرهوني"
انا كل هذا مايهمني، علمًا انه بحياته ماضربني ولا اذاني بكلامه
لكن شعور ان احب شخص بالنسبة لي يهان بهالشكل وقدام اطفاله!
كبيره وجدًا، المُضحك المبكي انه دكتور وماسك مركز جدًا حساس بالمنهج التربوي
ومعروف بين الناس بالارشاد وغيره واحنا اكثر بيت لو احلف كل فرد فيه يبي يهرب منه
خلال هالاحداث تشكلت شخصيتي الحذرة والفاقده للثقه وبرضو تفكير سوداوي تجاه الرجال
وكاني داخله حرب معاهم اي شخص ينتمي للرجال فهو كائن مُستحقر عندي
ولازم يكون لي حُكم مُسبق لكل رجل اتعامل معه.. اتصرف بهالشكل مع الكل
بسبب والدي اولًا وثانيًا بسبب خوالي وعماني الي اكتشفت انهم يتعاملون مع الزوجة وكأنها
بهيمة
على وشك الزواج من شخص انا مُجبره عليه لامخيره
والادهى اني استشفيت من خلال حديثي معه على نقائض كثيره
بعد ماتكلمت معكم بكل هالقوه انا اقولها لكم وكلي خوف وتعب وهم
من ان كارثة امي وابوي تصير لي.. انا وحده مليانه عقد مليانه عزة نفس مليانه امراض
كيف ممكن اخلي هالزواج ان صار ينجح؟ لا املك لاحول ولاقوة في اني اقول لا
ولا راح اخضع واتنازل وبنفس الوقت مابي اكون الطرف الشرير واتعامل معه كعدو
انت كرجل وانتِ كأمراءه انصحوني.. انا ما انخلقت لاكون شخص خاضع واتنازل كلام الي تحملي وتحاملي لايمكن اقدر عليه ابي يكون زواج فيه احترام حتى وان كنا مانناسب بعض على الاقل كل واحد فينا حقوقه محفوظة
انصحوني وش هي ثوابت كل زواج ناجح من تجاربكم
اعرف وافهم ان زوجي مومثل زوجك وبرضو زوجة فلان ماهي مثل علان
لكن اكيد فيه ثوابت اساسية تُبنى عليها اي علاقة زواج ناجحه
كونوا لي من الناصحين
والمعذرة على الاطالة

* طاري ابوي لحد يلومني عليه ففيه اشياء كثيره ما كتبتها لكم بالاضافه الى اني ادعوا الله يعيني على بره واسلم نفسي لله بخصوص هالموضوع...




اضغط هنا للذهاب لعنوان موضوعنا...