مشكلتي مع بنتي الصغيرة وابوها( بعد التعديل)
 

السلام عليكم ورحمة الله وبركاته


بنتي لمن كنت في فترة النفاس عندي اخوها توه مولود وكانت تغير منه كثير
كنت مشغولة مع اخوها وكانت نفسيتي تعبانة بسبب النفاس وماتنفست عدل
وكنت ارضعه طبيعي بسبب انه عنده حساسية من الحليب الصناعي،، وكانت بنتي مع الايام تزيد غيرتها
اكثر واكثر وتنفس عن غيرتها بالشخبطة على الجدران،، والله مأساة البيت كان جديد تو بنيناه هو عبارة عن نص دور مع أهله هم تحت واحنا فوق،، اغلب الغرف في البيت مع الصالة مشخبطة،، والحين اخوها الصغير ٥ سنوات ونص وهي ٨سنوات تقريبا،، ودايما اقول لابوهم خلينا نركب ورق جدران او نصبغ البيت وهو رافض،،

في البداية حط السبب مني وانا الله يعلم كيف كانت نفسيتي ذيك الفترة مع غيرة بنتي الزايدة،، بنتي عصبية وعنيدة حتى في دراستها متعبتني ماتستجيب ولا تسمع الا بكيفها ودايما مطنشة الدراسة صف ثاني وماتعرف تقرأ وتكتب مضبوط كنها بالروضة تأسيسها بالروضة ضعيف بسبب كثرة غيابها وعدم استجابتها مع الاستاذات
واستمر الحال صف اول استاذتها كبيرة في السن وتاسيسها ضعيف والان أستاذة صف ثاني كانت شديدة،،
ابوها موب راضي يفهم اني اعاني مع البنت،، احاول ادرسها وديتها مدرسة خصوصية ولافي فايدة،،
المشكلة كل مكالمته عن موضوع الجدران يعصب ويتنكد وينكد على،، ماعنده تفاهم،،
هو حاليا غير موظف ويشتغل في أوبر ويستفيد من نظام ساند فقط لانه الان بدون عمل خرج من الشركة إنهاء خدمة بطلب من المدير لانه يعرفه او انه صاحبه،،

المشكلة انه اهله دايم يعدلون في بيتهم وانا خاطري اعدل بيتي،، حتى أن اهله دايم يجونهم زوار وبيتهم مفتوح من قبل الحجر وانا اهلي لو زاروني يسوي مشاكل.. هو من النوع اللي هادي ومزاجي وعنيد وغامض واذا تعكر مزاجه يزعل و زعله يطول اغلب حياتي معه مشاكل،، بسبب عدم التفاهم،،
حتى اني كنت متعاونه معه اول الزواج وكنت موظفه واعطيه بطاقتي نصرف سوا تعاون بس طلع نذل ولئيم في مواقف كثيرة وجات فترة كان يهددني بالطلاق.. وتمر فترة وانا مسالمة احاول انسى وبس يصير زعل تتعب النفوس،،
حتى مع الدورة نفسيتي تتعب واحيان مايراعيني،،
مرت علي صدمات معه واكتشفت خيانات منه وتعبت كثير بس حاولت احافظ على بيتي وكنت حريصة انه ماخرب بيتي وظليت ساكته لين حصل ظرف وتكلمت وهو توهق لمن كشفته وقال اني تجسست عليه يبي يضيع الموضوع علشان يقلب الطاولة على انا اكتشفت ان شخصيته نرجسي واتعامل معه بحذر شديد ومابي اتطلق ولابي احد يتشمت فيني ابي اكون انسانه ناجحة مابي احس اني فاشلة،،
الله يعلم شقد صبرت عليه علشان احافظ على بيتي وعيالي ونفسي لاني ابي الستر وهو للأسف فيه مواقف كثير يحسسني انه مايعرف يحافظ علينا او انه تهون عنده العشرة،، انا عندي عيال اخاف عليهم على أنه ابوهم غير حازم في التربية ويدللهم كثير،، بس معي انا جاف وزعول بالذات اذا تكلمت في موضوع مايعجبه او تعكر مزاجه،، وإذا جيت ابي اعدل الجو مايهتم ولو زعلت مايعرف يراضيني الا بمزاجه،، تعودت اسعد نفسي بنفسي وماانتظر منه شى احس كني عايشة في صحرا والجو غالبا غيوم بدون مطر،،
ونادر يصفى الجو،، ان زعل احس بعدم الأمان معه،، يصير شخص غريب بالنسبة لي،، وكل واحد فينا في وادي،،
مع الحجر انا قلت لو فيه مجال يجيب جالون صبغ ونصبغ انا وهو،، افيدوني

وجزاكم الله خير

ارجو ان تهتموا بموضوعي فإني في هم لايعلم فيه الا الله ودعواتكم الله يصلح احوالي،، الله يجعلنا ممن شملتهم الرحمة والمغفرة والعتق من النار




اضغط هنا للذهاب لعنوان موضوعنا...